16 things about me?!

好耐冇update個blog，成個年假就係回應左facebook的一篇連鎖notes，唔想浪費，轉載至此......

一直諗住等夠16個人tag自己先回應這封疑似病毒的連鎖notes，然後發覺幾個朋友tag左我之後就冇人再tag，原來其實唔係好多人想了解自己！哈！

"規則：當你比人tag左，就要寫一篇note，含16項有關你的事情，習慣，喜好，目標....或任何各不相干但有關你的東西。最後tag另外16個人。你必須tag返tag左你的那個人。如果我tag左你，即係我想認識你更深。"

(1) 2004年，好任性地，先斬後奏訂機票一個人走去德國旅行找朋友，擔心死一向當我係bb的父母。翌年，又一個女仔去左英國找朋友，自己在倫敦住了幾天，還獨自入劇院看Phantom of the Opera，感覺很震撼，很捧！一直以為自已一個女仔咁做係好有型，但事實上成件事係.....令人擔心，因為我的安全意識好低，在香港都經常盪失路！

(2) 生命中有兩件事曾令我感覺好像世界末日：曾經試過入唔到大學。Year 1 時媽媽大病，以為她真的會離開。

(3) 正當以為世界末日過去了，原來失戀才令我最失控。

(4) 好貪心。嗜好/學的東西很多：瑜珈，跳舞，唱歌，話劇，鋼琴，結他.....不過冇樣精。阿媽成日話我"周身刀，但冇張利"。如果你讚我"多才多藝"的話，多謝你！事實上是當我"渣兜"時，可能你會見到我在天橋賣藝！哈！

(5) 很喜歡在舞台上的感覺，除了覺得表演藝術可以表達內心感情之外，最重要是感受到觀眾朋友們的支持。

(6) 很感激有一群對我不離不棄的朋友們，每次的表演，不論就算有幾爛，你們都會來捧場。

(7) 入職了這間院後，開始了歌唱表演 (其實以前從未試過)，從此以後，發覺自己愛唱歌等同愛做話劇。

(8) 朋友同事成日話，表演藝術才是我的正職，放工後才真正工作！

(9) 曾經有一刻想過讀演藝，但最後過唔到自己個關，總覺得興趣不能拿來搵食。但現在又很羨慕見到演藝畢業或正讀演藝的"年青人"，為自己的舞台理想而奮鬥。

(10) 以前做學生出醫院實習，很羨慕師姐們穿的那一條製服裙，覺得好型好pro。而家每日趕番工穿起那條製服裙，感覺很頹！

(11) 為人很衝動，又是"感覺型”，很多時下決定時，都是感覺行先，so far 都覺得自己好好彩，冇後悔過自己所揀的路。我對自己學業同事業的決定都很滿意，唯獨．．．．．．哈，自己估啦！

(12) 燥底！對住一ｄ應該認真時唔認真或講極都唔明的人時，總覺得好忟，但就係自己拿來忟，唔係發佢地脾氣。

(13) 好易喊！傷心會喊，嬲會喊，感動會喊，煩會喊。也試過笑到喊！

(14) 成日都攪到自己好忙好忙，彷彿根本唔能夠俾自己停下來，讀完書又攪這樣那樣。朋友們約的飯局又多數都希望盡量就到時間出席，成日都覺得"身不由己"，但又經常俾人話"自己拿來"！

(15) 每次一大班朋友的聚會，到出門時總是好有衝動想放飛機，但當出席後，往往玩得最癲最唔願走o個個係我。

(16) 沒被tag的朋友，不是我不想了解你，只是朋友太多，不能盡tag！如果我冇tag你，你又想再了解我多d，不妨再tag番我，我再寫多16點，哈！